|
La „teleferica Valtellina“ sco cha’l nom disch es ün indriz per far transports da laina e deriva da nossa val vaschina la Valtellina. Id es però da manzunar cha’l pionier da quist indriz derivaiva da Roveredo ingio ch’el ha installà dal 1888 pella prüma jada üna tala teleferica a frain. Quist indriz es eir gnü expost dal 1896 al l’exposiziun naziunala a Genevra, ingio ch’el ha ragiunt la medaglia da bronz.
Pro no hana cumanzà avant ca. 100 ons a fabrichar indriz cun suas per tuotta sorts transports. Quist patent s’ha verifichà impustüt eir per transports da laina raduonda in lös muntagnards e mal ragiundschibels. Eir in Engiadina Bassa e’l Partens sun gnüts realisats a partir dals ons trenta divers progets.
Il tema transports da laina cun fils m’ha adüna fingià fascinà. Quai varaja jertà da meis bazegner e da meis tat Mario ed Otto Vital chi toccaivan pro’ls pioniers da transports da laina cun fils in Engiadina Bassa.
Eir hoz amo as vezza ils stizzis d’als vegls fils in nossa regiun. P.-ex. Val d’Assa, Pramaran, La Foppa e.o.p. Per cha quists indrizs nun van dal tuot in invlidanza n’haja l’intenziun da refabrichar üna “Valtellina” sco model a Sur En Sent. Quist proget dvantess ca. 200m lung e pudess transportar laina ruduonda dal Plan da la Jürada fin gio’l Plan da l’Ogna. La “Valtellina” pudess gnir missa in funcziun pro differentas occurenzas. Plünavant füss quai ün’ulteriura sporta illa regiun dal camping Sur En, chi spordscha fingià uossa diversas attracziuns.
La “Valtellina” es eir ecologicamaing fich interessanta. Ella funcziuna plainamaing sainza energia. Causa la pendenza tira üna chargia l’otra e metta uschea in funcziun tuot il sistem.
Ün simil proget exista eir fingià a Talamona in Valtellina. No vain visità quista teleferica culla gruppa god Engiadina Bassa insembel cun noss schefs da god l’on 2004.
|
