Arrandschamaint da la scoula

Proget:

Missa Rotna

Infuormaziuns

Placat

Fotografias:

Prümas prouvas

Fotografias da las
prouvas cumünaivlas

Interprets:

Jachen Janett

Curdin Janett

Domenic Janett

Roland Christen

Andreas Schneider

Yasmine Meguid

André Renggli

Proget da chant: „Missa Rotna“; on da scoula 2004 / 05

Impreschiuns e impissamaints dals scolars davo la rapreschantaziun

• Schi, schi, uossa es tuot fingià passà. Per mai es quai ün curius sentimaint. Alch manca ... Tuot l'on vaina dovrà, plü o main tuot las uras da chant vaina investi per quist grond proget, ün venderdi ed üna sonda intera vaina chantà, ed uossa..? Tuot es passà. Eu n'ha propi stübgià üna pezza vi da quist bel evenimaint. A mai para vairamaing puchà cha tuot es fingià passà e davent sco üna föglia chi'd es gnüda soflada dal vent o sco ün'uonda chi vain adüna plü gronda e davo svanisch'la aint il ocean chafuol. Quai d'eira la Missa Rotna. Propi ün'experienza da chant e musica da jazz e rock n'haja fat. Eu stögl dir cha dürant las uras da chant nu m'haja adüna fat uschè plaschair da chantar, ma eu stögl eir dir: id ha rendü! Impustüt in baselgia d'eira bellischem. Il cling da mincha vusch as tgnaiva insembel grazcha a la baselgia. E lura pür il solist e la solista...! Impustüt la solista ha uschè üna bella vusch, uei che organ! Mo eir ils instrumentalists professiunals ... uei co cha quels san sunar ... üna bellezza.
  Cun quai cha'l stil da musica „jazz“ am plascha bainischem n'haja forsa eir gnü uschè ün gust vi dal chantar.
  Sü Tschlin nun esa i uschè straminabel bain. Jachen Janett ha gnü d'avair propcha blera pazienza. Sco seis oters fradgliuns es eir el fich musical.
  La solista ed il solist cun tuot ils instrumentalists, la magistraglia, ils scolars, la giuventüna ed oters chantadurs, lapro amo Jachen Janett, d'eiran tuots straminabels. E propi, sainza ün pêr persunas chi han gnü quist'idea, nu vessna chantà in sonda e dumengia la Missa Rotna.
  Las chanzuns africanas am paraivan però plü flottas per chantar. Bun am paraivan eir ils pass cha no vaivan da far, e nos bun Jachen faiva gnir la chosa adüna per ün bun pa plü umoristica.
  
• ... il prüm nu'm plaschaivan las chanzuns gnanca zich, il problem d'eira ch'eu nu chant uschè jent. Adüna nu vaiva neir na güsta blera vöglia. Ma, id ha cumanzà a plaschair vi e plü bain, e sch'eu pens uossa inavo esa stat ün bel evenimaint chi nu s'invlidarà uschè svelt, eir sch'eu nu vess cret quai....
  Tuot chi d'eira inchantà, tschertüns han dafatta dit chi hajan tschüf la pel giallina, oters chi nun hajan fingià lönch na dudi alch uschea, ed i tuorna eir: i tunaiva üna bellezza!...
  ... ed uossa esa a fin cun nos proget da chant cha nu tgnaran però adüna in algordanza.
  
• Nus d'eiran ün toc meglders a Sent co a Tschlin, forsa pervi cha l'atmosfera a Sent d'eira megldra co a Tschlin.
  
• La saira sun lura gnüts pro ils solists: duos flots tips chi savaivan chantar fich bain. ...
  In dumengia vaivna lura il concert a Tschlin. Quel nun es i uschè bain sco quel a Sent. A la glieud ha'l, craja, istess plaschü.
  
• Nos dirigent d'eira Jachen Janett. A mai para ch'el saja ün alleger. Jachen ha gnü üna fich gronda pazienza da muossar tuot quistas chanzuns. ... A mai haja plaschü sul bain cur cha'ls musicants sun gnüts a far las prouvas e'l concert cun nus. .... Quists duos savaivan chantar üna bellezza. La Yasmine chantaiva ün'otezza chi rumpaivan bod las fanestras da la baselgia. ...
  Il concert es lura i tuot bain, tscherts tocs dafatta fich bain. Minchatant vaina eir fat ün pêr bocs.
  
• Impustüt la vusch da la solista am plaschaiva bain, ma eir il solist vaiva üna bella vusch...
  ... ed i nu's stuvaiva pensar tuotta pezza vi dal concert e sperar chi nu capita alch per star mal, sco p. ex. s'inchambuorgiar in baselgia o chantar tuot fos.
  
• Jachen Janett es eir ün fich bun dirigent. El sa chantar bain e fa minchatant alch stincal, p. ex. cun chantar aint. ...
  Minchatant nu vaiva blera vöglia da chantar adün'inavant quellas chanzuns. Ma tuot in tuot d'eira il proget fich bel, impustüt aint in baselgia, cur cha tuot la glieud ha splattà e cur cha tuot es i bain.
  
• ... la saira vaina gnü il concert. Quel es i bain e là vaina eir tschüf blers cumplimaints.
  
• Sch'eu sun uossa sincera, schi stossa propi dir cha'l prüm nu'm plaschaiva nöa. Ils magisters varan fat per far alch flot, ma eu, eu nu d'eira cuntainta. ...
  Davo ün temp haja cumanzà a'm plaschair. ...
  Uossa es quia il grond di. ... Eu stoss dir la vardà: quist es propi stat fenomenal .... meis genituos, impustüt meis bap d'eira sul fascinà, ma eir a mia mamma haja plaschü fich bain.
  
• Las chanzuns da la Missa Rotna am paraivan lungurusas e na güst meis gust .... e cul temp n'haja tschüf adüna daplü plaschair vi da las chanzuns, ed eir las prouvas da chant nu'm paraivan plü uschè malas. ...
  Nos dirigent Jachen Janett faiva adüna darcheu cumplimaints. A mai haja parü ch'el d'eira ün fich bun dirigent, na massa serius, adüna cun buna glüna ed adüna cun skerzins....
  Il concert a Sent d'eira simplamaing grondius.... i's badaiva chi plaschaiva a la glieud, ed eir davo il concert as survgniva adüna darcheu cumplimaints. ..
  Ils solists nu savaivan be chantar fich bain, i d'eiran eir fich amiaivels e simpatics.
  
• Nus duos stuvaivan chantar bass culs homens e perquai vaivna mincha gövgia in nossa lecziun da chant liber, per la paja stuvaivna ir in dumengia a chantar.
  
• Quai chi d'eira ün pa stantus pro las prouvas in baselgia d'eira chi's stuvaiva tuotta pezza star in pè. Ma davo il concert, pensa, han tuots invlidà quai.
  
• Cur ch'eu n'ha vis ils texts n'haja pensà „ aaajjaa!“. I gnivan avant da quels pleds chi nu's savaiva bod gnanca pronunzchar. In quel mumaint n'haja stübgià scha quist po be gnir oura bain. ... Las chanzuns m'han cumanzà a plaschair pür cur chi'd es gnü pro Curdin Janett cul clavazin.... Las chanzuns dals solists am paraivan sul bellas, impustüt il gospel da Yasmine Meguid. Il bun vi da la chanzun dad André Renggli d'eira chi's tschüffaiva güsta buna glüna e vöglia da chantar....
  Eu chattaiva eir bun cha'ls solists nu d'eiran gnanca zich cul nas plü amunt co nus e ch'els vaivan ün milli gust cha nus laivan autograms.