Nat als 12 gün 1894 a Sent
Mort als 12 settember a Scuol

Figl dad Enrico e da Chatrina, nada Crastan. Neiv dal poet Peider Lansel. Maridà cun Ida, nada Mosca. Randulin, d'eira ingaschà sco commerciant in üna fabrica da medicamaints a Livorno. Stüdi da pittura a Paris. Sper la pittura, practichada dürant il temp liber, ha el realisà intagls in lain per la «Gazetta ladina» ed «Il Tramagliunz» (1934) ed illustrà las «Chanzuns umoristicas rumantschas» (1925) e «L'alba e la s-charbunada» (1933) da Men Rauch. El ha eir fat il disegn aint il cheminé dal Parkin, il disegn chi's basa sülla poesia "En ed Arno" da Peider Lansel.

Illustraziuns da Lüza Lansel aint illa novella da Men Rauch "L'alba e la s-charbunada"

 

 

Men Rauch scriva aint il salüd il seguaint:

Salüd a tai, stimà lectur
Scha nu voust tmair la lungurella
e scha tü est da bun umur,
Schi vè, ch'eu t'quint üna novella,
Chi ais avant blers ons dvantada
Na güst precis sco ch'eu at quint
In la part suot da la vallada,
A Scuol, dals olocs il lö distint.