Nat: 1644 o 1645 a Ramosch
Mort: 1733 a Ramosch
Figl da Martinus ex Martinis. El vain tut sü in sinoda l‘on 1666 ed es duos ons ravarenda a Sent. Davo la mort da sais bap dal 1668 è‘l ravarenda a Ramosch.
El es l‘autur da la Philomela, il cuntschaint cudesch cun psalms e chanzuns a quatter vuschs tenor melodias da Johann Wilhelm Simler, stampada dal 1684 da Nuot C. Janet a Tschlin. La Philomela cuntegna sper las chanzuns spiritualas eir chanzuns politicas, la plü cuntschainta es scritta dal bap da l‘autur, da Martinus ex Martinis: „Canzun davart la libertat da nossas 3. Ligias“. Quist cudesch es stat ün success, quai demuossan las 4 ediziuns dal 1684, 1702, 1751 e 1797. Dal 1693 ha Joan Martinus edi cun Andreas Rauch il cudesch da devoziuns "Abyss dal'aeternitat", e dal 1694 es cumparüda sia traducziun in ladin da "Ilg saltar dils morts" da Johannes Moeli. Martinus ha eir tadüt parts da la Bibla in ladin e vala sco l'autur dal "Cudesch cotschen da Ramosch", üna collecziun da documaints da seis cumün.
