Scoula da Sent, passlung
Das Dorf Organisation Wirtschaft Veranstaltungen Vereine Aktuell Suchen

Passlung da Scuol fin Martina

11 favrer 2010

Regordanzas da scolaras e scolars da 1.-3. reala

Nus rivain güsta giò Scuol pro la loipa. Eu pigl meis skis giò da la spadla e tils met sü. Ils plü svelts, quels passan be sper mai via sco tuns. “Mobain” pens’eu, “lascha’m ir”. Davo la prüma storta secha nu suna bun da far la storta. “Uossa spera cha quist ia oura bain”, ma tuot in üna jada daja be üna spuolvrada ed eu sun plain naiv. “Mobain quista fuada nun es mia unica”, am dia. Eu sun circa immez la gruppa e vegn meis agen tempo. Cur ch’eu sun a Pradella avant la storta gronda vaja tuot bain, eu sun amo in pè. Uossa vegn quel toc ch’eu vegn vaira gugent. Il toc gualiv. Davant e davo mai vezza adüna darcheu ün passlunghist, minchatant tschüff’eu oura ad ün e minchatant esa eir suotsura. Cur cha nus rivain aint ils Panas-chs suna surleivgià. Eu pigl giò ils skis e chamin be planet via pro üna saiv da lain e sez giò per far marenda. Tuot in üna jada doda üna vusch. Id es duonna Nataglia, ella dumonda a nus scha nus gnin eir a giovar il gö da l’hom nair. Eu fetsch ün sigl e sun darcheu süls skis. Giovar quel gö culs skis, quai es alch danar. Davo il gö giaina inavant fin a Sclamischot e là spettaina la posta chi vain da Martina.

Il prüm mumaint d’eira surtrat ed eu nu savaiva scha nus giaran o na. Quel di d’eira eir fich fraid ma cun ir as tschüffaiva chod. Eu giaiva e giaiva e vaiva l’impreschiun chi nu finischa mai. E tuot in üna jada vaina fat üna posa.
Davo avair mangià vaina giovà a l’hom nair culs skis da passlung.
Davo giantar savaiva ir bain “skeiting” ed eir “classic”. Sch’eu pens uossa fessa amo üna jada Scuol-Martina.

Tuots van giò da la loipa, be Inglina va ün toc giò per la costa e crouda in chülas. Lura improuv’eir eu dad ir giò pella costa e m'impais: “Id es amo vaira simpel dad ir giò per la costa. Speresch be ch’eu nu fua.” Davo alch fuadas vegna inavant. No giain sü per la loipa e darcheu giò. Urs es eir fuà dasper mai, ma el es stat sü ed es i inavant. Rivats a San Niclà stan Urs, Angelo e Carl là e no giain inavant fin oura Sclamischot. Il di davo vaivan tuots mal ils peis ed ün zich barba giat!

Hoz vegna a far passlung. Ma i nun es bler sulai. Sco il solit fua il prüm sco üna stuorna.
Nus passain Scuol, Pradella, Sur En e la punt da Sur En. La posa faina a Panas-ch. Davo giaina vers Strada. Prò la chava da glera fa Inglina üna fuada da gröss. Eu dumond “Eh, hast tschüf la mür alba?” Circa tschinch kilometers plü inavant vaja giò stipüras. “Pramfate”, e Sonja es in chülas e recloma cha daman varà’la üna gnofla dal chül blaua. Eu ed Inghi riain da crappar. Tuot in üna jada vegnan Urs ed Angelo ed Urs fua precis sper Sonja! Che riöz.
Pac plü tard riva Urs. Eu sbrai: “Urs va our d’via,” ma el nu mütscha. Meis skis van vi plü scunter al mür. ”Pramfate”, eu n’ha schon fat üna fuada da gröss. Che rier, eir duonna Nataglia riva e sto rier.

Tobias ed eu rivain pro ün clerai. Davant mai vezza cha la loipa va giò stipüras. Eu pens: “Ma, dessa ir giò da quia? Uhh, quist es vaira stip. Ma eu nu poss muossar a Tobi ch’eu n’ha temma. Ok, los geht’s.”  Eu vegn da la foura giò e bod ch’eu füss crodà. Eu guard inavo e vez a Tobias, el ha las chommas sbrajazzadas, ün bastun là, e tschel in man. Lura pensa: „Haha, uhh, dessa rier? Sta'l sü?” A verer al tip stossa rier da tuot pudair. Tobias ria eir ed el sta sü. Lura giaina inavant da quai malsgürs. Davo üna pezzina trottar, crodar e far passlung rivaina pro la gruppa. La prüma roba chi’m vain adimmaint es: MANGIAR!
La prüma roba cha nus fain però, es tour giò ils skis. Eu sun uossa be amo in t-shirt. La posa da giantar fa bain.

Eu met sü ils skis da passlung e pens: „Be cha quist giaja bain“. E lura partina. Eu n’ha ün pa problems, perquai ch’eu vegn pür la terza jada culs skis da passlung. Eu croud ün pêr jadas, ma inschinà vaja tuot bain. Davo üna pezza tschüffa ün pa mal la bratscha, perquai ch’eu stumpl be culla bratscha. Eu fu natüralmaing ün pêr jadas, ma quai es normal eir per profis. Fin pro la posa nu capita nöa da special, be amo ün pêr fuadas. Pro la posa vegna ter svelt fraid, ma per la paja pudaina mangiar alch. Davo üna pezza giovaina culs skis a l’hom nair. Pac plü tard eschna its inavant, natüralmaing chi giaiva plü greiv cul vainter plain, ma a la fin riva istess fin oura Strada.

No eschan rivats giò Scuol pro’l cumanzamaint da la loipa. Il prüm suna i pro Florinet pels skis. A la partenza n’haja amo pensà cha quai nu sarà sgüra nö greiv, quist passlung. Eu n’ha miss sü ils skis e n’ha improvà da ir ün pa al lö, là ingio chi’s pudiva ir ün pa per trenar. Eu sun i giò d’ün muotin, ma na aint illa loipa e quai es stat il sbagl. Eu n’ha cumanzà a far il spagat e sun crodà sül bruost. Tuots chi han ris! Cur ch’eu sun stat sü, n’haj’eir eu cumanzà a rier. Davo vaina tadlà che cha’ls magisters han dit. Pac mumaint davo eschna partits ed eu sun i tuot il viadi dasper meis ami e nus vain discurrü tuot il viadi be dad ir a far passlung e da meis nouv “I Pod”.

Cur ch’eu d’eira aint in let la sair’avant n’haja stübgià co ch’eu rivarà il meglder oura Martina.
Il di davo eschna lura its giò Scuol cul auto da posta. Eu d’eira ün pa agitada pervi cha no eschan its cun tuot il s-chalin ot. Eu crajaiva cha quels füssan tuots bler plü svelts co eu. Cur cha no d’eiran lura cagiò vaina miss sü ils skis e lura eschna planet partits. Ils prüms sun crodats aint illa naiv lomma fingià pro la partenza. Eu sun ida cul scuffel be uschè planet inavant. Oura Panas-ch vaina fat marenda, ils prüms d’eiran fingià üna ter pezza chi spettaivan. Quels chi vaivan a fin la marenda han lura giovà a l’hom nair be culs skis sainza bastuns. Quai es stat fich flot. I’s crodaiva per terra, tschels riaivan ed oters mütschivan. Davo üna pezza eschna lura its tuots inavant. I giaiva güst amunt, quai d’eira amo ter stip. Cur ch’eu d’eira süsom d’eira our d’flà. Cun ir aval suna circa ida ün sfrach aint per Rebecca. Ella es crodada immez la loipa ed amo avant mai. Eu sun lura ida ün toccun cun Nicole, ella d’eira quist on la prüma jada süls skis. Cun ir ün ter toc aval n’haja fat üna svolada sül glatsch. Uossa n’haja üna botta blaua. Davo suna ida plü o main tuot suletta fin oura Martina. Eu d’eira ter stangla cur ch’eu d’eira coura, però eu n’ha gnü gust ch’eu sun rivada fin oura Martina!
Eu sun aint illa posta da Sent a Scuol e pens: perche stuvaina ir hoz a passlung. Perche nu giaina in mardi, lura crodess oura bilologia ed inglais. No rivain a Scuol ed eu chamin da Clozza giò fin pro la loipa. Là tschüffa mia roba da passlung ed eu sper cha mia roba guarda oura specialmaing bain. Eu tschüf mia roba e constat cha ella guarda oura amo vaira bain. Uossa vegna via pro la loipa e vögl metter sü ils skis, ma eu nu sa plü co, mo üna duonna declera a mai e lura vaja. Il prüm esa da tadlar amo ün pa che cha'ls magisters quintan e lura possa ir. Eu vegn cun Angelo ün pa plü pachific, quai es amo bun, pensa, lura vaina a tschels davant no e vain alch da rier sch'inchün crouda giò.
Id es ün di fraid, eu sun a la partenza a Scuol. Davo pac mumaint süls skis fua giò dal stip. Pac pü tard am bütta bod darcheu per terra! Sü dal stip esa greiv ed eu schglisch tuotta pezza inavo. Rivà sülla punt discuorra ün pa cun Matias, nus giain insembel o bod insembel fin oura Sur En. Là pigliaina giò ils skis e chaminain sur la punt via. Nus eschan ter davovart, mo bain, nus fain be pachific. Da là giaina amo circa ün kilometer e lura faina giantar tuots insembel, tschels sun fingià plü lönch là. Quels chi sun fingià plü lönch là, giovan ün gö cun duonna Aita e tschels mangian a fin. Planet vegna fraid; bun cha nus giain inavant inschinà füssna bainbod dschets. No giain sü per la loipa chi’d es ter stipa e cur cha nus eschan casü vegn güsta eir Nicole cun nus. Martina es be davovart e vain adüna plü dastrusch, eu vegn inavant ed inscuntr ad Urs ed Angelo. Nus eschan ter ils ultims darcheu. Cuort avant Martina capita: eu croud cun ir aval ed am fetsch mal las costas. Forsa pervi ch’eu sun uossa fich stanguel crouda eir pluffer. Uossa nu riva plü, eu vegn amo fin Strada e lura esa fini. Angelo ed Urs spettan cun mai quia la posta. Prosma jada vegn eir eu fin oura Martina.

Apaina rivada giò Scuol n’haja miss sü ils skis da passlung. „Ingüna vöglia nun haja, e dad ir culs plü svelts quai sgüra nö.“ Uossa finalmaing pudaina partir e cun dar ün sguard inavo vezz’eu fingià a far üna cupicharoula ad ün pêr, ma cun verer inavo che capita? Eu croud be sech giò per per terra. Eu stun sü e vegn inavant, e lura bada ch’eu sun magari davo aint. I’m vegn adimmaint ch’eu n’ha impromiss ad Arina ch’eu giaja cun ella, eu dun gas e quai natüralmaing sco Dario Cologna, fin ch’eu sun pro Arina tuot our d’flà. Tschinch minuts plü tard n’haja fingià pers ad Arina. Eu guard in sü ed ingiò, ma impussibel da chattar ad Arina. Cun ir duos pass inavant vezz’eu ad Arina aint illa naiv lomma, eu tilla güd sü e nus giain inavant. Finalmaing eschna rivadas a Sur-En, là pigli’eu giò ils skis per chaminar sur la punt via. Davo la punt possa fingià darcheu metter sü ils skis. In quel mumaint para sco sch’eu nu vezzess plü inandret, ma id es uschè sco ch’eu vez, Joghi es amo davant mai ed Arina. Eu pens: „Respet, respet!“ Davo desch minuts ed ün pêr fuadas sezzaina fingià sül bankin e mangiain nos bun panin.