| Chanzun per l‘ eivna dal god |
Las impreschiuns d'üna partecipanta |
| Dschembers |
Scolars e magistraglia -
a scoula aint il god!
Imprais vain bler da vaglia
e profis eschan bod.
|
Ils magisters han decis da far ün'eivna da god! Il prümischem, sco scolar, nu's savaiva bler che cha quai füss. No vaivan da ramassar butiglinas e vaiderins da cremas. Quels dovraivna per alch apoteca aint il god.
Eu m'allegraiva schnuaivel per quist'eivna da god - schi vaina bain in dumengia saira ün telefon cha'l proget gnia spostà, perquai chi hajan miss trid'ora. Eu d'eira gnüda ün pa gritta, perche eu d'eira propi pronta per quist proget.
A la fin vaina lura istess pudü cumanzar cun nos proget. Il prüm vaina tuots imprais a cugnuoscher las gruppas, gronds e pitschens, giuvens e vegls. Mincha gruppa chaminaiva la bunura e davo giantar pro lur post, uschea faiva minchün robas differentas aint il god.
Da quist proget da god n'haja gnü bellas impreschiuns e fat differentas experienzas. Eu d'eira schefa da gruppa, uschè n'haja gnü üna respunsabiltà fich gronda. A mai haja però plaschü da pudair muossar e güdar a quels da scoulina ed eir a quels plü gronds. Per mai es quai stat bod il plü bel ed il plü flot da tuot. Lönch am n'haja dumandada co chi's vain a da quistas ideas stupendas, da far alch uschè grondius. I s'ha propi vis cha'ls magisters han gnü üna lavur straminabla. Quai esa propi da lodar e da far ün cumplimaint!
L'important per mai d'eira cha eir “ ils pitschens” pudaivan zambriar e far lur experienzas. Mincha lavur am ha vairamaing plaschü grondius, però sch'eu sun seriusa, lura stossa dir, cha lavurar cun laina per far üna chamonnina nu d'eira nömia uschè simpel. Là vaivan nempe “ils gronds” üna respusabiltà fich gronda. Els vaivan da star attent da nö far mal o ferir a quels da scoulina.
La finischiun dal proget da god es statta l'olimpiada da god! Quel di es stat il blü bel ed il plü flot. Eu sun statta stutta che bellezza cha olimpiadas pon esser, perche olimpiadas dschaivan a mai vairamaing adüna be: cuorrer, cuorrer, cuorrer...
A pensar inavo, am vegnan adimmaint bleras bellas experienzas ch'eu n'ha pudü far cun tuot mia gruppa. Eu sun sul stutta che chi's po tuot far aint il god. Quist proget m'ha eir muossà fich bler da la natüra. Eu less propi dir ch'eu spera cha eir tschels hajan gnü tant plaschair e gust da quist proget e chi hajan eir els giodü quist'eivna tant sco eu!! Id es propi stat la cana e mez!
|
| Pins |
Guardai nossa chamonna
a l‘ur dal Plan Tramblai!
Vain fabrichà cun romma -
la perla dal clerai.
|
| Larschs |
Blers stizis cugnuschaina,
rivir ils ögls es bun!
Qua, d‘ün arogn la taila
per tschüffer il muos-chun!
|
| Arschüclers |
Pro‘l fö, nossa cuschina,
da tuotta sorts vain cot,
masdà üts e masdinas
cun plantas our dal god. |
| Frouslers |
I‘s douvra fantasia
per far alch inandret.
Minchün as dà fadia
da far ün bel purtret.
|
| Baduogns |
La musica giodaina
cun suns e tuns dal god
noss instrumaints sunaina
perfin il tschüblarot.
|
| Trembels |
Ed a la fin finala
il sport nun ha mancà.
Pro nossa olimpiada
clomaina: hop - hurrà! |
|
|
|
Fotografias 
Program (pdf)
|
