|
Sent less dvantar cità d’energia
Il cumün da Sent voul promouver üna politica ed üna gestiun d’energia perdüraivla. Quai voul dir, cha la producziun, l’adöver e la gestiun d’energia vegnan resguardats e definats illa gestiun da cumün, in ourdens ed in ledschas cumünalas. Our da quel motiv ha decis il cussagl da cumün da constituir üna cumischiun d’energia ed inviar la procedura per ragiundscher il label “cità d’energia”. Implü sun definats ils böts da la politica d’energia i’l plan directiv dal cumün da Sent.
La certificaziun sco “cità d’energia” es ün label arcugnuoschü chi demuossa cha’l cumün certificà lavura cun instrumaints e masüras chi garantischan cha’l tema ‘energia’ saja preschaint i’l minchadi.
Il label “cità d’energia” nun es üna ledscha. Il cumün da Sent es liber dad accumplir a lunga vista las pretaisas dal label o na. La tematica d’üna politica d’energia perdüraivla stuvess però esser il böt per tuot la populaziun da nossa terra, independent da labels e ledschas!
La cumischiun d’energia (Jon Carl Rauch, Men Caviezel, Andri Poo) ha tscherchà, elevurà e valütà dürant ils mais passats diversa documainta per accuplir il label “cità d’energia”. Davart da la società ‘Energiestadt’ vegn il cumün da Sent accumpagnà da sar Thomas Blindenbacher.
Ils seguaints documaints e las paginas d’internet cuntegnan infuormaziuns davart il label ‘cità d’energia’ e davart las sportas dal cumün, dal chantun e da la confederaziun.
|
